Hukumar dake kula da kafafen yada labarai NBC ,ta sanyawa wasu kafafen yada labarai 25 takunkumi .

Daraktan hukumar dake kula da kafafen yada labarai na kasa Balarabe Shehu Illele  ya bayyana sanyawa wasu kafafen yada labarai 25 takunkumi sakamakon karya dokokin hukumar (NBC) a lokacin zaben shugaban kasa da na ‘yan majalisun tarayya.

Bayanin na  zuwa ne  a ranar Laraba ,yayin da yake zantawa da manema labarai, ya kara da cewa hukumar ta kuma baiwa wasu kafafen yada labarai 16 gargadi domin su gyara ayyukansu.

Ya kara da cewa wasu daga cikin wadannan kafafen yada labaran , sun baiwa baki da masu fashin baki har ma da masu kiran waya a yayin shirye-shirye damar furta wasu kalmomi mara sa da dadi ba tare da yi musu linzami ba.

Balarabe Illela ya kuma bukaci sauran kafafen yada labaran kasar da su mayar da hankali wajen sanya kwarewa da kuma bin doka da oda yayin gudanar da ayyukansu.