Ziyarar Shugaban Kungiyar Ecowas a birnin Tunis

Ziyarar ta zo ne a daidai lokacin da ake kai hare-haren wariyar launin fata da ke shafar yan ci rani da ke kudu da hamadar Sahara a kasar da ke arewacin Afirka.

A lokacin da majalisar tsaron kasar ta gudanar da taro a watan da ya gabata, shugaba Kaies Saied ya danganta bakin haure da ba su da takardun izini da haifar da  tashin hankali da aikata laifuka.

Kungiyoyin kare hakkokin bil adama sun bayar da rahoton karuwar tashe tashen hankula da suka hada da kashe bakaken fata ‘yan Afirka, tun bayan kalaman da shugaban kasar ya yi na farko yayin da bakin haure ke cewa an jefar da su daga gidajensu baki daya aka mika su ga “adalcin ’yan sanda”.

A kwanakin baya ne aka dawo da dalibai da yan ciranin tattalin arziki daga kasashe, irin su Guinea da Mali da Ivory Coast da suka tsere daga Tunisia.

A farkon makon nan, hukumomin Tunisiya sun ba da sanarwar daukar matakin inganta yanayin yan kasashen waje a Tunisiya da kuma saukaka hanyoyin ga masu neman daidaita al amura a duk fadin kasar.