SHUGABAN KASAR KAMARU NA BIKIN CIKA SHEKARU 90 DA HAIHUWA

Yau Litinin 13 ga watan Fanrairu 2023, ssugaban kasar Kamaru Paul Biya yake bikin cikarsa shekara 90 da haihuwa, kuma a matsayin shugaban kasar da ya fi dadewa a duniya a yanzu.

Shugaban ya taso ne a kauyen Mvomeka’a dake kudancin kasar a shekara ta 1933 kuma ya kama mulki a shekara ta 1982.

Wasu rahotanni na nuna cewa gazawar shugaban wajen inganta rayuwar ‘y‎an kasar da kuma tashe-tashen hankula dake samuwa daga ‘yan aware dake amfani da harshen turanci sun dusashe karsashin da gwamnatin shugaban ke da shi tun farko-farkon dalewarsa karagan mulki.

A yanzu dai ba a yawan ganin shugaban a bainar jama’a kuma yawanci ana ganin sa ne a kasashen waje.

A sakamakon dadewa da ‎ yan kasar suka yi basu ganshi ba a shekaru biyu da suka gabata har aka yada jita-jitar mutuwarsa a sanadiyar cutar korona.

Yan hamayya suna ta kira da ya sauka daga mulki, a yayinda kuma yan kusa dashi suke cewa ya ci gaba da mulki.